خاوة وعلاش العداوة. (زجل)زهرة لمهاجي. من صحراء المغرب

 خاوة وعلاش العداوة. (زجل)

لساني يكول غير الخير

ينصح مايفضح الغير

يحن ويدبب الصغير

ويراعي ويساير الكبير

يشهد بالحق مايقبل تزوير

وينظم الشعر والقوافي

ولخوه مايحافي، مايجافي

ذهب ونقرة ونحاسي صافي

غصن من شجرة الشرفة واسلافي

تكول أرى ماعندك يالسان من قوافي

تتحداني زعما وتحك نحاسي

عنداك تغلط فيَّ، راني باحلافي

صوابي واخلاقي عمارة اكتافي

وملي تعدى الحدود نجبد سيوفي

القلم والدواية ، ونزمم بحروفي

زجل ، وموزون ، معاني وقوافي

مغربية حرة ،على بوي وجدي واسلافي.

نتلي العيب ، ونبرد العوافي

ومانقبل حكرة ، ولا هوافي

ايوى هذا لساني مرة صافي

مرة شلال يفيض يعمر المطافي

حسب قوالك ، يكون جوابي كافي

اللسان مافيه عظم ، وأنا مانحافي.

عبر شبرك وكلس فيه وبقى دافي

سخونيت الراس ترميك في الفيافي

وبارك ماتشعل النار وتحرك العوافي

حنا خوت وعلاش العداوة، وتحافي

وتحرض الغريب يقطع رزقي و اطرافي

بلادي و راني حررتها برجالي ومصحافي

نسوان ، شِيب وشباب وصوت الحسن ينادي

بلا حرب بلا سلاح ، معجزة الزمان هتافي

وزعما عار الجار على جارو ياخوي سخن كتافي.

لسان ولهجة حنا ودم ونسوبية ، وكلام و قوافي

كلشي واضح ، مابقى شي خافي ، غير طفي العوافي

جانح للسلم ، وعلى ترابي وبلادي فايق ماناعس ماغافي

الخير بالخير ، وعلى قدم وساق واقف، وسلاحي على اردافي

فتحوا الحدود راه دمنا مخلط ،علاش دماغكم مكفن ومحنط

بغينا نعنقو خوتنا ،راه ديما خاوة، وخا تعيى تحرض وتخطط

زهرة لمهاجي.

من صحراء المغرب

ماد نتعى، زهرة لمهاجي و٤ أشخاص