بالنيابة عن جميع المجروحين.....نجوى محمد

 بالنيابة عن جميع المجروحين

والعشمانين والمشتاقين للماضي

أو لناس مشيوا

أشهد بأني هاقدر احكي عن وجعكم

واقدر اكتب شعر عنكم بس دية المرة الوحيدة

مش هاكون شاعرة بتقصد تحكي شئ عن خلق باعوا

او اكون قاصدة اعبر عن جميع الحزن فيكم

هي دية المرة الوحيدة اللي بكتب شعر ليا

مش قصيدة بصيغها ليكم

النهاردة!

اقدر اني اقول تعبت

واقدر اشكي بصدر واسع واحلف اني بقيت وحيدة

النهاردة حتي حلمي مش سند وانا مش حديدة

كل شئ ف الحزن جايز إلا حبك كان اكيد

كل شئ ف الضعف سلبي وانت كنت أقرب بعيد

النهاردة روحي بتعيط وتحلف أني تعبانه للورق

والورق مبقاش حقيقي قد عمري اللي اتسرق

والحنين طال روحي لما قلبي عيط واحترق

والوجع صب الليالي ف كاس شقايا والعرق

واللي فات من عمري كله كان مجرد مش حقيقة

واللي قاللي الدنيا حلوة نسيت اقوله هات طريقة

والجميع خد بعضه لما لقوني واقعه ف الحريقة

سابوا ايدي وقالوا طفي، طفي وجعك بالطريقة

والطريقة سابتني لما عرفت إني نزفت خوف

والتوتر قالي جنبك مش هسيبك ف الظروف

والصحاب ملقيتش ايدهم حتي ف رسالة وحروف

والجميع اتخلوا عني وقالوا جربى قالوا شوفى

شوفت حزني ف لمة ساقعة فيها داء المصلحة

واما قومت وقولت همشي قالوا عادي بالسلامة

واما هل الحزن شافني وساب ف قلبي ميت علامة

وأما عيني شافتني بنزف خبت الباقي ابتسامة

روحت رايحة بيتنا قالي بصى ما بلاش الملامة

والوجع حط الكراسي وقالي اتفضل معانا

السرير رفض الحكاية وقالي بلتىني ببكاكى

قولت ماشي انا كنت ماشية ومش هعود غير بالدليل

كل ما امشي خطوة بلقي اني بنزف مش بميل

وان كتفي سندني لكن خاني ف الليل الطويل

واما بصيت للمراية لقيتني مبقيتش الجميلة

الهالات السودة زادت والشغف عمال يقل

كل حاجة ف عيني ماتت إلا سعيي لناس تدل

والجميع قفل بيبانه والبشر فضلت تذل

كله قالي خلاص كفاية بس صعب ايأس وامل

هفضل امشي لحد ما امسك حل ليا

رجلي هلكت بس مش هتقل بيا

املي قالي الصبر طول وانتى روحك مش قوية

والحنين زود جراحه وقلبي مش قد الأذية

بس لسة الصبر قادر يطفي روحي من الحريقة

رحت رايحة ع المراية لقيتني عجزت بطريقة

يومها بس عرفت اني لسة مش لاقيه الحقيقة

نجوى محمد

٢٢