ربــــاعــــــيـــــــات إنـــــــــــــــسان..
(1)
ما بين حياتك وموتك كلام..
نصه أهات ونصه ملام..
ما هو أنت لو سمعت النصيحه
كنت أرتضيت ولبست اللجام..
************************
آه يا عمر فى العيون طويل
و يا حلم أصعب م المستحيل
عمرك و حلمك ساقيه و تور
نملة و عايزة تبقى فيل..
************************
كوابيس كتيرة و أشارات مرور
عتمه و حيرة و ألف سور
وموزة صفرا وسط القرود
أخرها عصرة وتصقيف حضور
************************
حاولت أضحك ف يوم تلات
مسكت وشى تلت ساعات
قاللي رصيدك يا حلو خلص
أنت نسيت عاشورا الل فات..
_______________________
. (2)
صوتك خلاص مهوش مسموع
حسرة و محبوسه بين الضلوع
هس ولا حرف ولا نص نفس
أنت م الضحك والبكا ممنوع
************************
انتخابات وزحمه و كلام كتير
و قماش يرفرف كأنه طير
ووعد ناعم ريش نعام
مربوط ف كرسي بخيط حرير
************************
شعاع أمل جي من بعيد
و توب أبيض حلو و جديد
قربت منه حولت ألمسه
لقيت إيدايا مربوطة ف حديد
************************
يا حلم اتولد مليان بالوهن
يا عود قرنفل ريحته عفن
حكمت عليه محكمة الحياة
بسجن طويل قضبانه محن..
_______________________
. (3)
عصفور وطاير بين الغصون
غصن عقل و غصن جنون
جناحه ف السما يرفرف
لكنه ف غربته مسجون..
************************
آه يا ولدي ليه اتولدت
مهموم و ف الزحمه إتفرمت
عنتر و فارس شجاع مغوار
و حبة جبنا خلوك فطست
************************
مشيت و جريت و فجأة وقفت
صرخت و همست وفجأة سِكت
ضلك وراك مربوط ف ديلك
و أنت منه إتفزعت و هربت
*************:***********
عين بتضحك وعين بالبكا بتنوح
زغروته خرسه حسها مبحوح
و إيد مصهلله نفسها تصقف
لكن أختها شُريانها مدبوح
بـــــــــقلـــــــــمــ✍️أمــــــين مــراد
ليست هناك تعليقات:
إرسال تعليق
اهلا وسهلا ومرحبا بك في مدونة واحة الأدب والأشعار الراقية للنشر والتوثيق ... كن صادقا في حروفك ويدا معاونة لنا ... فنحن حريصين علي الجودة ونسعي جاهدين لحفظ ملكية النص .