♧زجل غنائي♧
♤الدَّارْالْبيضاء♤
الدَّارْالْبيضاء تـــيهالَكْ يَبْهَرْ الْعينْ
أَنا مَــــــنَّكْ طَرْفْ عـــاشَقْ هْواكْ
وانْــــتِ مَـــنِّي مَتْرَبْعَة فْ الدَّاتْ
الــدَّارْ الْبيضَاء زيــنَةْ مُدُنْ البْلادْ
واهْ واهْ وااااااهْ يا الدَّارْ الْبيضَاء
دَرْبْ السَّلْطانْ ؤُالمْدينَة القْديمَة
الْــــحَيْ الـمُحْمَّدي ؤُسْباتَة تْباتَة
شَلاًّ مَـــنَّكْ أحْياءْ بْعَشْقَكْ تَدُّوبْ
الـــدَّارْ الْبيضَاء زينَةْ مُدُنْ البْلادْ
واهْ واهْ واااااهْ يا الدَّارْ الْبيضَاء
نــــــاسَكْ نَــــــخْوَة أوْلادْ البْلادْ
ِبيــــــضاوَة نــــاسْ العَزْ المْلاحْ
شــــــوفْ ؤُجــــــولْ يا السَّايَحْ
الـــدَّارْ البيضَاء زينَةْ مُدُنْ البْلادْ
واهْ واهْ وااااااهْ يا الدَّارْ الْبيضَاء
الْبَيْــــــضَاء ديما ضاوْيَة وَلَّافَة
خـــويا وأخْتي يَلاَّهْ يَدْ واحْدَة
نْـــــحافْظو عْلى نْقاوَة الأَحْياءْ
الــدَّارْ البيضَاء زينَةْ مُدُنْ البْلادْ
واهْ واهْ واااااهْ يا الدَّارْ الْبيضَاء
لا نْـــخليوْ مَنْ جَهْدْنا العَشْرانْ
نَّظْــــــفو ؤُنَبْنيوْ ديما المَزْيانْ
أخْــــــتي أُخــويا يَلَّاهْ الڭَدَّامْ
الدَّارْ البَيْضاء زينَةْ مُدُنْ البْلادْ
واهْ واهْ وااااهْ يا الدَّارْ الْبيضَاء
يــــــَلَّاهْ يلَّاهْ يا بيضَاوَة العْزازْ
الْبَيْضاء واسْعَة مَعْشوقَة تَبْهَرْ
تاريخْ مْأَصَّلْ جْدَرْ هَمَّة وْشانْ
الدَّارْ الْبَيْضاء زينَةْ مُدُنْ البْلادْ
واهْ واهْ وااااهْ يا الدَّارْ الْبيضَاء
الْبَيْضاء غَرْسْ الأوْتادْ ؤُالبْتاتْ
زَرِّيــــــعَة تامْرَة فايْحَة عْطورْ
سُــــمْعَة وْتَقْديرْ فْ كُلْ الْعالَمْ
الدَّارْ البَيْضاء زينَةْ مُدُنْ البْلادْ
واهْ واهْ وااااهْ يا الدَّارْ الْبيضَاء
البَيْضاء جْوانَحْ إِقْتِصادْ الوَطَنْ
عْــــــلى كْــفوفْها شَلَّا مُنْجَزاتْ
العَزْ وَالنْصَــرْ الْبيضاوَة الَأحْرارْ
الدَّارْ البَيْضَاء زيــنَةْ مُدُنْ البْلادْ
واهْ واهْ واااااهْ يا الدَّارْ الْبيضَاء
فْ كُلْ ميدانْ أنْتِ ساسْ البْلادْ
إقْتِصادْ وْصِناعَة فاتْحَة البْيوتْ
يْحَفْظَكْ رَبِّي الْعالي هَمَّة وْشانْ
الــدَّارْ البَيْضَاء زينَةْ مُدُنْ البْلادْ
واهْ واهْ وااااااهْ يا الدَّارْ الْبيضَاء
بقلم ذ.محمد حديش
12\05\2022
