للصبح سهرانة هالوردة العشقانة...بقلم الشاعر / سليمان نزال

للصبح سهرانة هالوردة العشقانة

للصبح سهرانة

هالوردة ِ العشقانة..

و أنا بمحبتها..براقب الثواني

و أنا من نجمتها.. بضوي وجداني

و اللهفة خبتها.. لبعد رمضاني ..

و الهمسة غطتها بسحر الأجفان ِ

و الكلمة حطتها..ع شط الأماني

و البوسة نسيتها..حتى لا تنساني ..

و المهرة رسالتها... من وحي الأوطان ِ

و العزة أخذتها لعشق الفرسان ِ

و الفرحة عودتها لقدس الكنعاني..

للصبح سهرانة..

هالوردة الحيرانة..

مرة بتسأل روحي..

و تجاوب من شرياني...

و نبضي ع قصتنا

و قلبي ع غزلاني...

و ع شمس بقصيدة...

بتشرق بالمعاني...

و ع جرح بنشيدي..

بنزف في الأغاني...

ع حزن الشريدة

واقف مع أحزاني..

و ع أمة بتعاني

من قهر الطغيان...

أيديها بالماضي...

بتبحث عن مكاني...

للصبح سهرانة...هالوردة العشقانة..

يا قمري نامي.. ع صهوة زماني..

و صومي للمحبة..و أتركي أحضاني..

سليمان نزال