ليه القمر زعلان؟
ليه القمر زعلان..
ما زلنا في رمضان
منكتب حرف للحب
بيهرب مع الغزلان
منتبع حلم بالقلب..
بيكبر مع الأوطان
منرسم فرح بالشمس
و قوس القزح عشقان
بتسهر بشهر الصوم
نبضة نهر عمان
و منعشق بدر بغداد
موعدنا في لبنان
و بوسة بحر طرطوس
فيها حبق و مرجان
و بوسة بحر حيفا
فيها وعد فرسان
صوت الفخر بدور
من تونس و للسودان
بلبيا حزن و نسور
و الأخضر في الشريانْ
ليش المهر زعلان
و صوم الشهر إيمان
قلبي أنا في القدس
واقف على الأغصان
ماشي العشق من "صور"
واصل على "تطوان"
مغرب عندي جذور
و من صنعاء لبيسان
و من القاهرة "لأسوان"
وفخري أنا بالشام
"بلوبية" عشق وجدان
شفت النبض من نور
و سورك "عكا " أركان
نزلت على المنثور
طلة عتب حيران
بكرا يا يافا نزور..
بحرك مع البستان
و حق النسر مهدور
ما بيعرف النسيان
بنوا للوهم قصور
و مجد الصقر بنيان
برفع جبينه سور
من العراق لوهران
شيد بدمو جسور
مرّت عليه أزمان
قباطية أرض ودور
فيها الفخر فرسان
بمسك بإيدو عصور
و عينو على الأوطان
وبغزة جرح يثور
نازل على الشطأن..
رافض قهر موتور..
رافع نزف أشجان
ما تقولي ليش نسيت
عواصم الخلجان..
مع إني رديت
ع اللي طبّع و خانْ
ما بحكي عن الشعب
و لكن عن الطغيان
شفت الورد مأسور
بيعزف على الأحزان
نص الزمن مشطور
و بدندن في ألحان..
ليش القمر زعلان
من كلمة لسليمان !
رمضان و كل شهور
بزندو المجد ميدان
واقف على دجلة
و موج الحزن أحزان..
بكرا الوقت بيحلى ..
و نهر القمر منصان
منحمل درب للدرب
وفينا العزم بركان
و مندعي سوا يا رب
يحرر أرض كنعان
سليمان نزال
ليست هناك تعليقات:
إرسال تعليق
اهلا وسهلا ومرحبا بك في مدونة واحة الأدب والأشعار الراقية للنشر والتوثيق ... كن صادقا في حروفك ويدا معاونة لنا ... فنحن حريصين علي الجودة ونسعي جاهدين لحفظ ملكية النص .