رسالة من شهيد.....بقلم الشاعر كارم والي

رسالة من شهيد

بلغوا سلامي للوطن
وقولوله..دا مات شهيد

مات وسلاحه في إيده
مات وهو سعيد

مات بيدافع عن أرضه
وعن عرضه ده شئ أكيد

من يد عايزة قطعها
بيجري في عروقها الصديد

من عقل رافض كلمة وطن
من فكر صلب وعنيد

من قلب قاسي ومفتري
القتل عنده إدمان شديد

مات وهو بيحمي بلده
بيحمي رايتها والنشيد

كانت أمه تقولله دايما
خللي قلبك زي الحديد

يبوس إديها وهو ماشي
فرحان كأنه في يوم العيد

حالف ياخد بتار أخوه
اللي مات غدر ووعيد

وتار زميله وتار قريبه
وتار الجد....والحفيد

بس بلادنا فيها رجال
وحوش من نوع فريد

يقدروا ياخدوا بتارها
ويجيبوا حق الشهيد

ولو راح واحد فداها
فيه مليون فدائي جديد

قادر يموت ألف مرة
وبرده يموت وهو سعيد

وعجبي

كارم والي