من قصيدة :
( شكر الله سعيك )
للوداع
سكة واحدة
ناس كتير مشيوها قبلك
يا إما انت المسافر
يا إما واقف بيقولولك
عظم الله أجرك
سكة مُرة
كل ما فيها مُفزع
هي مَرة
واللي سابك مش هيرجع
ولو صفيت علشانه دمك
جوه عينك
كل دمعة زي صخرة
جوه قلبك
ألف صوت لألف صرخة
مين يشيل الحزن عنك
راح حبيبك
ومش هيرجع
لو جبت كل الناس تدمع
مش هيرجع
مش هينفع
ولو حتى وهبته عمرك
راح حبيبك
مش هيرجع
شمسه تاني مش هتطلع
كل ألمك
مش هيشفع
مش هيرجع
ولو قطعت عشانه جسمك
كان ف إيدك
كان معاك
كان شمالك
كان يمينك
كان وراك
النهاية ماكنتش عنده
ولا كانت حتى عَندك
مش هيرجع
نزلت ستاير عيونه
ومستحيل يرفعها حزنك
لِم ضعفك
لِم ألمك
واللي باقي لسه منك
واُقف وقول بصوت مقطع
شكر الله سعيك
كلمات : أسامة رفعت
ليست هناك تعليقات:
إرسال تعليق
اهلا وسهلا ومرحبا بك في مدونة واحة الأدب والأشعار الراقية للنشر والتوثيق ... كن صادقا في حروفك ويدا معاونة لنا ... فنحن حريصين علي الجودة ونسعي جاهدين لحفظ ملكية النص .