يا خطابه
ياخطابه أنا لى طلب وصريح
أحط شروطى للى هتكون حلالى
عايز صبيه بنت راجل عال ومليح
قنوعه وحنونه وتمشى على قد حالى
......
وتكون على قدر من الجمال
وفى الحشمه تتعلم الستات منيها
من أفعالها على الراس تتشال
وعنيها متترفعش من تحتيها
.......
وقبل كل الكلام الحكم يكون لأبوها
رباها على الأدب ومشيتها تكون بميزان
لاتمشى تتمايل علشان الشباب يشوفوها
ولا من بيت أبوها تطلع ولا تختلط بجيران
......
وتحفظ سر البيت ويبقى جميل بيها
وتحمد ربها عالقليله واللقمه الحاف تكفيها
لا جيران فى يوم يسمعوا صوتها
ومهما يحصل فى دارها ماتطلعشى للغير تشكيها
.........
قالت يا زينة الشباب عايزنى فين ألاقيها
مواصفاتك صعبه وأنت كأنك مش عايش فيها
دا أنا لوفيت على كعوب رجلى من شرقيها لغربيها
لو طلعت بربع مواصفاتك أشكر ربنا عليها
.......
الموضه خلاص ياولدى ضيعت بنات البلد
وخلت كل البنات ماشيه على كيفها
لأب نافع يحكم ولا أخ قادر يقول غلط
وبقيت الموضه حريه والغلط بقى سيفها
.........
والنت خرب البلاد وعماها
ولا حد للحال المايل سند
لو جميلة الجميلات ومفيش آدب
تقدر تقولى إيه حلاها
........
ياولدى عملنا زى الغرب وعمايله
والبنت بقيت تقول أنا زى الولد
بتسمع عن الآدب لاكن مش طايله
أوصافك تقيله ومش هتلاقيها فى البلد
........
أوصافك ممكن تكون قديمة الدقه
وكان موجود زماااااااان منيها
لا كنا نسمع على قصر ولا شقه
ولا كنت حتى تشوف كعوب رجليها
.......
كنا بنتلف بملايه ويادوب عنينا طالعه منيها
نمشى وسط البلد ولاحد يعرفنا
ومن بيتنا لغيطنا ولا كأنى عايشين فيها
وعشان حافظين كرامتنا ياما عمام شرفنا
........
دلوقتى البنت بتقعد على الكافيه
ورجل على رجل وتطلب كمان شيشه
وعصير فريش وبعدين نسكافيه
بالزمة ياناس دى تبقى عفيفه
.......
قلت ياخطابه كفايه كلام
سديتى نفسى من البنات
أتارينى عايش فى الأوهام
ياريت ما سألتك عالستات
..........
قالت ياولدى على أى حال
أنا قلتلك على فيها
ولو معاك خزاين مال
مواصفاتك مش هتلاقيها
................ شاعر الشعب أحمد خلف الحامدي.............
ليست هناك تعليقات:
إرسال تعليق
اهلا وسهلا ومرحبا بك في مدونة واحة الأدب والأشعار الراقية للنشر والتوثيق ... كن صادقا في حروفك ويدا معاونة لنا ... فنحن حريصين علي الجودة ونسعي جاهدين لحفظ ملكية النص .