همس الأموات....بقلم الشاعر/ كارم والي

همس الأموات

ميت بيقول لميت
مالك كدا مالك ؟؟
شكلك ليه حزين
إيه بس اللي جرالك ؟؟

راح فين حسنك وجمالك
وفين قوتك وراسمالك ؟؟

مش إنت اللي كنت أمير
وكان عندك قصور كتير

راحت فين سطوتك
وعزوتك وعيالك

فاكر لما جيت لك
وقلت لك جعااااان

طردتني من قصرك
وضربوني رجالك

ساعتها كنت طمعان
في حفنة من أموالك

وقتها دعيت عليك
أديك شفت اللي جرالك

دلوقت أنا وإنت سوا
شاربين نفس الدوا
بنتنفس نفس الهوا

ودا ماكنش علي بالك

لا نفعك غرور حضرتك
ولا نفعتك أموالك

أكيد شفت العذاب ألوان
وإتقطعت أوصالك

وربك هو الحق
ودي نتيجة أفعالك

******

يامن عشقت الجمال
زور قبر طل وشوف

تلقي الجمال إتردم
والعضم صار مكشوف

وقدود كانت جميلة
وعيون كانت بتشوف

دلوقت لو بصتلها
والله...تموت من الخوف

وعجبي

كارم والي