أنا مين............بقلم ... شاعر الشعب أحمد خلف الحامدى .....

أنا مين
أنا إنسان ولا جماد ولا نبات
أنا الحلم إللى كله أهات
أنا المطيع وأنا الغلبان وأنا إللى كلى سكات
أنا الشقيان وأنا المحروم من حقى ليوم الممات
..
أنا مين
أنا إللى عدت عليا سنين مادوقتش فيها طعم الزاد
أنا إللى كل يوم أقول تتعدل أتاريها ملهاشى ميعاد
أنا أللى سافرت وياما كافحت وعمرى كله عدى وفات
أنا أللى ياما شربت عذاب ودلوقتى تقولى ماليشى أولاد
..
أنا مين
حرام عليكى تطلع من بوقك بكره تقولى ماليش أحفاد
ماكنتش عايز أسمع منك دى قسوه منك ولا عناد
هو خيرك ليه لغيرك مش إحنا أولى من الغربه فى البلاد
ولا عشان ضعيف وحنين . قوم تأجريلى جلاد
..
أنا مين
أنا إللى يوم ماغزوكى زمان أنا إللى كنت من قدام
أنا إللى رويت رملك بدمى . كانت حقيقه مش أحلام
أنا إللى ياما سهرت ليلك . رغم أنه كان كله ظلام
أنا جيشك وأنا نيلك .ماتبعينيش بحق إسمك فى القرآن
..
أنا مين
أنا حقى فيكى كل حاجه .. حرمانى ليه من كل حاجه
لما تحتاجينى بتلاقينى .. أبوس أرضك وأقول عباده
وأشيل روحى على كفى .. لا يهمنى منصب ولاحتى قلاده
بس لما أحتاجلك فى يوم ... ما تدوسينيش تحت البياده
..
أنا مين
يعنى لما أحتاج لحضنك .. أفردى جنحاتك وأحضنينى
عشان أنا إبنك ودمك .. أنا إللى ياما شلت همك
أسمعى منى كلتين .. بس إحتراما لسنك
ياتكونى حنينه وتحضنينى .. يا إما خلاص هتبرآ منك

..... شاعر الشعب أحمد خلف الحامدى .....