ياليبيا شاريك بقلم الهادي خليفة الصويعي/ ليبيا

ياليبيا شاريك
لو باعك كل البشر
تستاهلي بالروح نفديك
أنت ربيع مفتح بزهر
لا تبكي الله يخليك
أيام شدة تعدي وتمر
صحيح الطعنة لما تجيك
من قريبك أدهى وأمر
لكن بإذن الله يشفيك
وتطلي كما يطل قمر
وم الحسرة يموتوا أعاديك
ويفرح اللي يحبك ويُسَر
**
الدمع اللي في عيونك رقراق
كاويني, ووهجه حراق
وحزنك هزني م الاعماق
دموعي حابسهم صابر
ياليبيا أنت بلد الخير
مقدر هكي فيك يصير
من أولادك ماهو م الغير
وهذا هو اللي يحير
مستغرب كيف كنا خوت
وإحنا حوت بياكل حوت
و صرنا نتحرك بالريموت
والريموت بيد الغير
ياليبيا أنت كنت جنة
ورد وزهر وتبر وحِنة
تحولت فجأة يا حَنة
نار تلفح وجوهنا وسعير
وأولادك زادوا على همك
ولا واحد لصدره ضمك
مع الغير يمصوا في دمك
تقول ماشافوا منك خير
بس حوذي عهد وأكيد
لابد يزول التنهيد
وعودك يخضر من جديد
صبرك يا أمي عُقبه خير
اللي عاثوا فيك الفساد
عملاء وحاقدين وحُساد
ما ينحسبوا ليك أولاد
أنت يا أمي أولادك غير
أولادك اللي يحسوا دمعاتك
وما يناموا من صوت آهاتك
لابد يأخذوا بثاراتك
والله معاهم خير نصير
**
بين خوتي نزغ الشيطان
وولع بينهم نيران
وزرع الفتنة بكل مكان
واخذهم لوادي غي
ويزين في طريق الشر
ويجلب في جيشه ويكر
وهدفه كل شيء يدمر
وما يمكر كان المكر السيء
وتحالف مع كمشة حاقدين
نصارى ويهود ملاعين
وركبوا ظهور المنافقين
اللي منهم الاسلام بريء
وصار يلهد برجله وبالخيل
وعاث فيها فساد وتقتيل
ووين ماتميل الكفة يميل
وناره ما تبقي على شيء
والهدف واضح م العنوان
من يوم وقوفه بالميدان
وتهاطلوا عليه العميان
كما فراش تهاطل ع الضيء
يومها ليبيا صوتها ضاع
وحاطوا بيها ذئاب وضباع
والراعي قبض ثمن وباع
وع الخازوق جلس البي
وتبدل ربيعها بخريف
وبسرعة تحول للصيف
بعد الصيف جاها صيف
هجير ونيرانه تكوي
ودخل الشر من كل باب
وتقاتلوا اللي كانوا أحباب
وهطل مطر محمل بعذاب
وريح عقيم هب قوي
وغابت الشمس وعم ظلام
وبكوابيس تبدلت الاحلام
وانتشرت الامراض والالام
ما واحد منها ناجي
لكن رغم الهم وشره
بإذن الله تعودي حره
وتتفتحي كما برعم زهره
ويبزغ فجرك يبهر ضيء.
الهادي خليفة الصويعي/ ليبيا