كورونا
والله بهدلتينا معاكى
وذليتى الغنى قبل الفقير
لاعبتى كل الناس بهواكى
حتى إللى نايم عالحرير
.......
يا كورونا إهدى شويه علينا
حتى علاجك مش لاقيين
لو نعرف إنك جايه علينا
كنا حذفنا ألفين وعشرين
.......
دا أنتى ولا هتلر فى زمانه
نازله حصد فى الملايين
ولو يوسف شافك فى منامه
كان مصلك موجود من سنين
........
خليتى الكل يخاف من بعضه
ولما نشوف بعض نمشى بعيد
ويروح يوم وييجى إللى بعده
لا أتهنيت بصوم ولا صلاة العيد
.........
خلتينى ما شى بوسواس
بيزن وصوته دايمآ فى ودانى
بمشى فى الشارع خايف من الناس
ولو وقعت غصب عنى الناس كأنها مش شايفانى
............
ولا حد ييجى يقولى مالك
يخاف حتى يعدى من قدامى
أصلى كورونا بتودى فى مهالك
وأفضل ساكت والسكين سرقانى
.............
خسايرك تريليونات دولارات
دا غير الخمسميه بتوعى
خليتى العالم فى دوامات
وكل واحد ماشى شيوعى
............
بس أحب أقولك متشكرين
إنتى إللى عرفتينا وشوش
عرفنا الأصيل من الخاينين
وعرفنا القناع المغشوش
........
............. شاعر الشعب أحمد خلف الحامدي.........
ليست هناك تعليقات:
إرسال تعليق
اهلا وسهلا ومرحبا بك في مدونة واحة الأدب والأشعار الراقية للنشر والتوثيق ... كن صادقا في حروفك ويدا معاونة لنا ... فنحن حريصين علي الجودة ونسعي جاهدين لحفظ ملكية النص .