عرّاف مدينتنا
***********
بقلمي / عادل عبد الرازق
----------------------
طول عمري باحلم يا حبيبتي
والحلم وسع المدى
ولا عمري وصلت يوم
ولا دربي مرّه ابتدى
ماعرفش ازاي كسرتني الخطوة
واحترت ازاي في حروف الغنوة
ولمّا حاولت أرددها ..
كانت يا حبيبتي لحن حزين
حبيتك بس احترت معاكي
وعشقتك بس رماني مداكي
في ظلام الليل ...
وفي بحر مالوش شطّين
أنا لمّا اتمنيت اني أكون
فارس أو عاشق مجنون
فتحت باب المدى شوفتك
غربة وهوامش وظنون
بصيت لخطايا ..
ولقيتها بترجع خطوتين
رقصت ريح الليل أشباح
وصار برد الليل كله جراح
ماعرفش ازاي رفضتني بيوتي
وحروفي اتخنقت جوّايا ف صوتي
ولأول مرّه ..
أشوف في عيون يا حبيبتي زنازين
وأحس ان ميلادي ..
عكس ميلاد التكوين
عرّاف مدينتنا كان قالّي ...
حتحس في مرّه انك حبيت
لكن في حقيقتك إنت سجين
لحبيبتك وغرورها يا مسكين
عرّاف مدينتنا كان حبّ في مرّة ..
لكن ماوصلش ..
في الحب لعنوان
***
بقلمي / عادل عبد الرازق
----------------------
ليست هناك تعليقات:
إرسال تعليق
اهلا وسهلا ومرحبا بك في مدونة واحة الأدب والأشعار الراقية للنشر والتوثيق ... كن صادقا في حروفك ويدا معاونة لنا ... فنحن حريصين علي الجودة ونسعي جاهدين لحفظ ملكية النص .